قال لك يسقط ..
أهو ما سقطشى..
قال لك قاعد
مش ناوى يمشى
و إحنا نخلل زى الطرشى
و زى المحشى بيحشونا
قالوا إرادة شعبية
عند عبيد و تملّية
و إللى دماغه محنية
غير القاعد فى الجونة
يعنى ثورة ما ثوراشى
كله بامر البكباشى
برلمانات فيها طواشى
و لسة بهية مسجونة
صللى على إللى هيشفع فيك
طول عمرها مركوب مماليك
و إدعى إن أفندينا يديك
حتة من ورك معونة
خايب إنتا حقيقى يا مان
خليك واقف فى الميدان
غنى و قول يا للى أمان
و إنعى الثورة المحزونة
ما يهمكشى حدود و يهود
و ما تحلمشى العدل يسود
للسلطان ددبان و جنود
و عنده سلاح المكرونة
فاهم يا إبن المجنونة؟؟؟؟

أيا شعبى يا شعب الخير
رأيت فيما يرى المحبوس
أعاديكم خطر و كتير
ما بين كفار و بين هكسوس
و مجلسكم مخاضه عسير
و ثورتكم ضربها السوس
لذا قررت أمر خطير
مخاطرة أمرها مدروس
أنا إستنسخت منى مشير
و تحته ماكينة ليها تروس
شيوخ بتفصل التفسير
و قسيس عُقر إكليروس
و قاضى يحلل التزوير
و نائب عام فى بحر فلوس
و نخبة عامية فى التنوير
و شعب ف أى داهية يدوس
سيبونا حبة م الدساتير
مفيش حاجة تساوى الروس
خدوا التعويض صرر دنانير
بلاش حمقة و شغل تيوس
أنا لسة رئيس و كبير
و لسة حكمى ع المرؤوس
مفيش فى بلدكو دى تغيير
ما دام حكم الضمير معكوس
و ده المكتوب و دى المقادير
على قورة وطن منحوس

صلوا صلاة مودعين ..
صلوا صلاة المنصورين
إللى يموت منكم شهيد
و إللى يقع منهم لعين
و متخافوش..
لو بانوا ياما مسلحين
و ما ترجعوش..
كل إللى ناقص خطوتين
و نطهر الأرض الحرام
من التتار.. و البياعين.

ما دايم إلا وجه الله..
و بعده إنتى..
يا لعنة لسة راكبانى
يا سر جنوحى و جنانى
يا جرح يحز شريانى
و يغرز نصله فى رقبتى
جرالك إيه يا نساية؟؟
أنا إللى شلت غمة ليلك الأبدى
أنا الميت فى حضن الحلم و الراية
و أنا إللى قلت بسم الله
فى أول سطر فى حكاية
حروفها مكتوبين بالنور
و أنا المنحور
و أنا إللى رغم خذلانك
ما زلت بَ أثور
و لسة الحق جوايا
ما زال منصور
و أنا إللى لما أشوف وشى
يبص ف عينى فى مراية
بكون مكسوف
و بخجل من ساعات الخوف
و أركز في ملامحى
ألقى شهدائك....
..........
يكونش العشق ده دائى؟
و نكران الجميل دائك؟؟؟

و رجعنا زى زمان ..
إذا نزل الفتى
قصاده دستة مخنثين
إللى قالوا له الواد ده لو مات
لك أمان
و إللى قالوا له يموت عشان
نصرة لدين
و رجعنا تانى قليلين
لكن رجعنا موحدين
متأكدين
إن الإله إللى خلق م الطين
بشر متخيرين
خلق ضمير
و خلق يقين
إننا بنعيشها مرة..
و إننا بنموتها مرة
و إننا بإرادة حرة
ننوى على فين محشورين
إما جحيم المرجفين
و للا نعيم الثائرين
ِ

يا بانى التأسيسية
من قش و فوقه ريش
قامت رياح قوية
النصبة بقت مفيش
عايز تشبع لوحدك
و إحنا فى الجوع نعيش
صدق إللى قال جماعة
تخاف ما تختشيش
يا بانى التأسيسية
روح عيط للشاويش

الكل باعك..
الكل ساعة المصلحة
كتف دراعك
فى إنفجارك و إندفاعك
الكفن وحده إللى ساعك
و إللى فاضل من متاعك
هو إللى باقى م العلم
وحده الألم
من رصاصة جاية تاخدك للعدم
الموت فقط
هو إللى يتحدى إمتناعك
الكل باعك
حتى .. أنا

نقول يا حى
طابور الدم
ع القضبان
و دورنا جاى
و طول ما فى
بشر تركع
و على باب
الطغاة تخشع
هيفضل فيه
بشر تجمع
مسيرة ثورة
تشرق ضى
و قبضة يد ..
مضمومة
فى شهقة
ام مكلومة
تقول يا حى

قبل ما تناموا الليلة دى ..
فكروا..
كام أم لطمت ع الخدود؟
كام حلم شايل بكرة
مش ممكن يعود
كام فكرة كانت ممكنة
كام ذكرى ساكنة الأمكنة
معقول رخيص أوى دمنا
و أهلنا .. واقفين شهود؟

ملعون أبو الأخ إللى أوسخ م اليهود

لسة الحمول ع الكتاف..
قنطار من الحيرة
معجون ب مية خلاف
بين أهل و عشيرة
و لا كل مبصر شاف
الرؤية ب بصيرة
و لا سلم من خاف
و لا ترك سيرة
يا خالق الأحلاف
و مأمن الجيرة
ولف ما بين أخلاف
فى التوهة دى أسيرة
و إكرمنا بالإنصاف
و إرحمنا م الغيرة
و إفرق ما بين أحناف
و بين دقون عيرة

خدينى ف حضنك .. و إنتفضى
و إتنفسى أحلام .. من رفضى
أنا سابح ضد الموج و الريح
معقول من صوتى بتتخضى؟
معقولة داخلة صلاة تراويح
قبل ما تتسترى و تتوضى؟
أنا مستبدل راحتى بتباريح
و إنتى بتقبلى دية عوضى؟
سلام من كل شهيد و جريح
خرجوا يلعنوا إبن الرفضى
عيدهم بأه مولد على مراجيح
و قرار تسليم حكمك ممضى

إمسحوا الدرس القديم
لسه ف إيدينا البشاوره
و إكتبوا بطباشير دماكم
درس عن فقه المناورة
التمن مدفوع شهادة
مش هنركع للبيادة
هما بيقولوا إنتفاضة
و إحنا بإسم الحق ثورة

الرجا ربط الحزام
ع الدماغ قبل الإيدين
الرجا منع الكلام
قبل تغميض العينين
إنتو مين؟؟
و إحنا مين؟؟
إنتو صفر على الشمال
و إحنا حلفان اليمين
إنتو زحمة فى الميدان
وسط باعة جائلين
و إحنا سلطان الزمان
و العباد ملك اليمين
إنتو يا ولاد الأفاعى
لسة برضة مصدقين؟
أما بغل الشعب فعلاً
بين حصان و حمار هجين

أنا مندس فى المدسوس
و خاين و إبن كلب عميل
خربت بلاد كانت جنة
و قابض م العدو تمويل
ماسونى شبه علمانى
و حلم حياتى فى التدويل
و عامل فى الميدان غرزة
أنا و صحبة بنات الليل
و أوسخ من يهود خيبر
و ألعن من شرب م النيل
ف ليه سايبينى أتملعن؟
و أنا الملطوط ب ألف دليل؟
يكونش عشان لازم يفضل
هابيل دمه سبيل ل قابيل؟

على صرخة وجع فيا .. أنا الباكى
و ما سمعتيش
أنا إللى فتحت شباكى
أنا إللى بحج جواكى
كما الدراويش
ما تخرسنيش
ده صوتى الباقى من روحى
أنا مقدرش أكون صامت
و أشوفك و إنتى بتروحى
و ما ترجعليش
كفرت ب كل أسيادك
و أعيادك ..
و إيه هتفيدنى أمجادك
إذا الأحلام
ما بتعيشليش؟
ف ما تلومينيش
و لو حكمت ملامة يا مصر
تعالى نحسب الحسبة ..
نشوف مين فينا خد من مين
و مين إدا
و مين إللى وقف فى العسر
و مين ثابت ف يوم شدة
أنا إللى كنت مستكفى
ب حتة جبنة ويا رغيف
و كان طل السما لحافى
و أنا الحافى
و كنتى لما تستغنى
تبيعى الفقرا و تجافى
و كنتى لما تستعفى
قفايا أولى بالتلطيش
و أنا أول نفر فى الجيش
و أنا أخر نفر فى الدور
لا أنا طماع و لا مسعور
و لا بحلم ب باب مسحور
و لا مغارة على بابا ..
و لا عمرى طلبت ف يوم
سوى إنى أبات مستور
و ما بترضيش
تكونش الغلطة إنى لما جت فرصة
أبيعك .. قلبى ما طاوعنيش؟
تلومى .. و للا ما تلومي
مسيرى ف يوم هجيب حقى
مسيرى ف يوم ي مصر هعيش

كان زميل على تختة واحدة
كان شريك فى الحلم قبل الساندويتش
كنا فى الفسحة رفاقة
كان شريكى حتى فى الكورة الكاوتش
هو راح حربية و تجارة خدتنى
قلنا لا الصحوبية ماتت
و الشراكة ما إنتهتش
و السنين عدت علينا
كل ما تفرقنا تجمعنا القهاوى
و الحكاوى عن بلد غرقان نخيله
فى الأجازة كان يجيلى
فى المنام أنا كنت أجيله
كنت فاهم خوفه م الأيام و بكرة
ده طبيعى لإنى صاحبه و إبن جيله
لما قامت ثورة الحق المبين
صاحبى كان فى الكاكى سبع من السباع
مبتسم .. رغم إنه خايف
زيي .. كان حاسس و شايف
إنه مهما العدل غاب
إن مهما الندل باع
مصر جيشها يشيل أمانة كالجبال
مرة واحدة ..
صاحبى مال
قال عليا بلطجى مجنون بيخرب فى البلد
معقول يا واد؟
ده أنا أخوك زياد؟
أخوك زيا ....
الغريب إنى ما حسيتش الرصاصة
و الخلاصة ..
نفسى أقول له إن أنا مسامح ف دمى
بس هل .. و ده السؤال
حضرة الظابط صديقى
مسامح ف دمى؟