شريط اخبار
اسامى اصحابى بتعدى قصاد عينى
مابين مجروح وبين ومقتول
ولسه الصورة قدامنا
شوارع فاتحة ع الجنة
وشهدا رافضة تستنى
ساعدها الفاعل المجهول ومش مجهول
وصرح حضرة المسئول
بان رصاصته مش ليهم
دى كانت طالعة تحميهم
ومش مقصودة فى المليان
ده فرق نشان
وبالغ اسفى للشهدا واهاليهم
خبر عاجل
شريط اخبار بيتغير على الشاشة
قضاء عادل
افادت كل مصادرنا
براءة كل من يحمل لقب باشا

“الخ .....
ع الارض ضل البشر عامل علامة قوس
والقوس ده ضهر اتحنى بيجسد الاحوال
احوالنا لو مشكلة متكونش ليه ع الكل
كل اللى كان ع البال لقمة وباب مقفول
مقفولة فى وشنا كل الببان بالأمر
بلأمر كل الببان مفتوحة للمحاسيب
محاسيب بقالهم زمن كاتمين على الانفاس
ان فاس ضرب فى الارض بيسرطنو الزرعة
والزرعة خابت أوى ومسقطة هدومها
وهدومها متأمركة كاسية البدن والراس
راس الفساد جنبنا قاعد فى تل ابيب
انابيبنا بتروحلهم والغاز برخص تراب
وترابننا للمرمغة والسحل م العسكر
عسكر صاحبنا وقعد مش ناوى يرحمنا
ارحمنا ياربنا وابعتلنا ناصر
ناصر اخوك فى رفح قول الكلام عبر
المعبر اللى اتفتح بعديه تلاقى جدار
جدارنا لما اتبنى جبنا الفلوس من فين
فين اللى قال اننا لو لم نكن ..كنا
كنا وكان يا مكان وحكاوى تمللى تاريخ
تاريخنا قال اننا كنا ملوك الارض
ع الارض ضل البشر عامل علامة قوس
والضهر بقى منحنى بيجسد الاحوال
كل اللى كان ع البال لقمة وباب مقفول
مقفولة فـ .......
.........
الخ”

مصر يا مه يا حزينة
ع اللي حاصل للولاد
لما ماتو قصاد عنينا
كنا جاهزين للحداد
مصر يامه يا حزينه
كنتي غايتي والمراد
باعو فيكي واشترينا
واحنا مش أد المزاد
مصر يامه يا حزينه
ليه اقولك متخافيش
لو فرحتي ان احنا جينا
ف احنا جينا علي مفيش
مصر يامه يا حزينة
كله شاطر في الكلام
فكرينا عشان نسينا
هو امتي الظلم نام
مصر يامه يا حزيبة
والدموع ماليا الميدان
احنا ليه مكتوب علينا
البرئ يفضل مدان
هو امتي الفرح دا
مصر يامه يا حزينه
ابكي يامه من سكات
واحنا كل اللي علينا
نقرا فاتحة علي اللي مات

قصاد نفسك
عيوبك كلها بتبان
عيونك شايفة كل مافيك بدون الوان
ولما الناس تكون شايفاك
بشكل مابتشوفوش جواك
هتعرف انهم عميان
محدش كان معاك غيرك
ودمعك جاي آخر اليوم
يبل مخدتك بهموم
يروح النوم
و مع نفسك تبات سهران
محدش كلمك عنك
وقالك كل شئ بوضوح
عشان الكل بيراعي
يكون شكل الكلام مسموح
واي صراحة مهما تكون
يا تتحامل يا بتجامل
شهادة بيبقي فيها جروح
قصاد نفسك تبان الصورة بالكامل
لحد الروح

ﻋﻠﻮ ﺻﻮﺗﻜﻢ ﻓﻮﻕ ﻏﻨﺎﻫﻢ
ﻭﺍﻃﻠﺒﻮ ﺣﻖ ﺍﻟﻠﻰ ﻓﺎﺕ
ﻟﺴﻪ ﻋﺎﻳﺶ ﺑﻴﻨﻜﻮ ﻗﺎﺗﻞ
ﻃﻮﻝ ﻣﺎ ﻓﻴﻜﻢ ﺣﺪ ﻣﺎﺕ
ﺍﻧﺘﻮ ﺍﺻﺤﺎﺏ ﺍﻟﺒﻠﺪ ﺩﻯ
ﺑﺎﻟﻜﺮﺍﺳﻰ ﻭﺍﻟﻤﻨﺎﺻﺐ ﻭﺍﻟﺸﻮﺍﺭﻉ ﻭﺍﻟﺤﺎﺭﺍﺕ
ﺍﻧﺘﻮ ﺍﺻﻞ ﺍﻟﻔﺮﺡ ﻓﻴﻬﺎ
ﻭﺍﻧﺘﻮ ﺍﺟﻤﻞ ﺣﺎﺟﺔ ﻓﻴﻬﺎ
ﺷﺒّﻜﻮﺍ ﺍﻳﺪﻛﻮ ﻓﻰ ﺍﻳﺪﻳﻬﺎ
ﺭﺟﻌﻮ ﻟﻠﺤﻠﻢ ﺣﻘﻪ
ﻫﺎﺗﻮ ﺑﻜﺮﻩ ﻣﻦ ﺍﻟﻠﻰ ﺳﺎﺭﻗﻪ
ﻭﺍﺭﻓﻀﻮ ﻧﺺ ﺍﻟﺤﻠﻮﻝ
ﺍﻗﻠﻌﻮ ﺟﺪﺭ ﺍﻟﻤﺬﻟﻪ
ﻭﺍﻗﻄﻌﻮ ﻛﻞ ﺍﻟﺪﻳﻮﻝ

كل ثورة وانت طيب
وانت طيب وابن ناس
ثورة ايه فكك خلاص
اللي مات الله يباركله
و الشهيد في الجنة فوق
وانت فاهم وابن سوق
الشهيد بقي ليه معاش
يعني دمه ماهوش بلاش
والقضايا في المحاكم
والمحاكم ليها قاضي
ربنا يطول في عمرك
كل ثورة وانت فاضي
وانت راضي ومستقر
عايز اقولك كلمة سر
عجلة الانتاج سليمة
انما حكومتك لئيمة
دول بيخزو العين ياباشا
واحنا اصلا في انتعاشة
والفلوس رجعت يا مان
كل ثورة وانت شايف
قلة واقفة في الميدان
والشيوخ في البرلمان
والعصابة في اللوما
ن واحنا عايشين في الأمان
حتي مش عايزين بوليس
ده احنا فلسعنا الوريث
والسؤال دلوقتى انت
عامل ايه من غير رئيس
كل ثورة وانت طيب
خد شوية كمان فى كيس

مصر التى فى خاطرى وفى فمى
ممنوع عليكى ليه ببكرة تحلمى
مع انك الحلم اللى ساكن قلبنا
طول عمرنا
يا مصر همك همنا
مسروقة من مليون سنة مبتخلصيش
وبرغم جوعنا وفقرنا قادرين نعيش
قادرين فى وقت الحرب نبقى جنود وجيش
ونموت كمان
وقبورنا تبقا من حواليكى سور امان
يا مصر ابنك مش جبان ميهمهوش
من دبابات ولا طيارات ولا من جيوش
بس اللى حابس كلمتك حبة كروش
بيمصو قوتنا ودمنا مبيشبعوش
مبيسمعوش
صوت الفقير اللى ماهوش لاقى الرغيف
صوت الغلابة اللى بتشحت ع الرصيف
وعيالها تحلم بالسكن
مبيسمعوش صوت الضمير اللى اتركن
عمال بتعلن رفضها تبيع المكن
صوت فلاحين عايشين فى ارض مسرطنة
يا جمهورية فى العلن وفى الخفاء مستوطنة
صوتك يا مصر بيتسجن وبيسمعو للطنطنة
فلتعلمى انتى التى خاطرى وفى فمى
ولتعلمى
لا هيمنعونى انى احلمك ولا يمنعوكى تحلمى

طلعت معاش غصبن عنك
ومعاش ولاكان اللى يقولك
اقعد فى البيت
دى القعدة تموت فيك صاحى
وتصحى فى عكاز مش توبك
الخطوة المش شايلة صاحبها
مكانتش فى يوم ضمن عيوبك
وجيوبك.....صبر وبونبونى
وعنيك ملاكين بيحاوطونى
حراس احلامى الوردية
وطلعت معاش غصبن عنك
يا مقضى العمر ف وردية
نضارة وجرنان ع القهوة
وطابور الاعانات فى البوسطة
ابدا مش هما الترضية
يا محارب فى الشيب من اول
شعراية ابيضت فى سنينك
احساسك بالضحك فى صوتى كان اكتر واحد بيعينك
تكسر تجاعيد وقفت ضدك
تتعافى فى وش المشوار
دلوقتى خلاص مبقاش فى حياتك اى قرار
محكوم على قلبك بالراحة
والراحة الاجبارى مرار
ده السد بدون حاجة يحوشها
بمرور الوقت بينهار

وايه يعنى
كلامك نُصه يوجعنى
ونُصه التانى شوق ليّا
وايه يعنى
تمد الإيد وتمنعنى
وتاخد إيدى بالتانية
مسيرك يوم هتتأكد
تقرب حتى أو تبعد
ساعتها بس هتحدد
تجيلى أو تودعنى
وهأفضل برضه مستنى
وايه يعنى

وايه يعنى تغيبلك يوم
وترجعلى فى يوم تانى
فى حبك قلبى لو مظلوم
ياريتك تظلمه تانى
براحتك اوعى تستعجل
قرارك صعب مش ساهل
أنا عن نفسى هاتحمل
لأنك حد يستاهل
أنا باتمنى تختارنى
ده بُعدك شئ هيكسرنى
خسارتى لما تخسرنى
ياريت يا حبيبى تسمعنى

هتعمل مهما راح تعمل
هاحبك برضه وهكمل
بدأت هواك من الأول
محال لو شئ يرجعنى
وايه يعنى

لأنك لسه مش عارفة
وخايفة م اللى بتحسيه
هاخش فى مرحلة هدنة
وهاعلن وقف اشواقى
ولما ليا تشتاقى
هتلقى قلبى مفتوحلك
وبيبوحلك بأسراره
ويوقف هدنته ويعلن
يكمل بيكى مشواره
لكن دلوقتى سامحينى
انا ضد اللى بيننا يكون
محبة من طرف واحد
هتاخدى منى تدينى
بلاش قلبك يكون جاحد
سهام الحب رايح جى
مهيش رايح حبيبتى وبس
وانا قدمت لعيونك
حاجات يامة اوى تتحس
ورد الفعل منك صفر
وما نتيش قادرة تختارى
فحتما انى اعلنها
غرامى فى مرحلة هدنة

ببعت رسالة موجهه لكل الظروف
طعم الحياة مبيتحرمش من الفقير
جناحاتى رغم القصقصة بتقدر تطير
ومفيش تذاكر للفضا
ومفيش ضرايب ع اللضا
ومفيش كمان شبهة خلاف
مابين عنادى والرضا
لكن خلافى مع المقولة المغرضة
ان الفلوس مش كل حاجة وكل شئ
مع انى برهن خطوتى قبل الطريق
وادفع ضرايب ع الامانى وع الطموح
حلمى اللى كان ساكن معايا على السطوح
سابنى وطفش
وانا ريقى ميت م العطش ومن المرار
لكنى رافض للخضوع قدام ظروف
رافض اعيش من غير ماشوف يوم يبتسم
يا طريق بيرفض يترسم انا هرسمك
هحميك من اللى بيسرقو منك أنا
ايه يعنى فات تلاتين سنة من غير أمل
الحلم برده هيكتمل
والانهيار مش محتمل وماهوش مصير
صبرا كتيييييييير
جناحاتى رغم القصقصة بتقدر تطير

كانت اجمل مرة في عمري اعدي الشارع
علشان انعم ايد في الدنيا حضنت ايدي
كنت متلج اوي م البرد
فجأة لقيت الشمس بتشرق جوه وريدي
واتعمدت بكل ما فيا
اني اخلي الخطوة بطيئة
رغم ده كله كانت اسرع نص دقيقة
يحصل ايه لو بس تطول
انا فكرت اني اطلب منها
و نعدي الشارع بالطول
لكن سبقت هي لساني
لما بصوت متحني اغاني قالتلي سلام
وانا ملقتش في صوتي كلام
سحبت ايدها وسحبت مني ساعتها الروح
اجمل حاجة في عمري خلاص عماله تروح
سرقت قلبي خلاص بإيديها
كان احساسي ساعتها مخيف
واما حاولت افتح عيني وابص عليها
اتأكدت بإني .... كفيف

طبطبت كتير

علي كتف كتير من ناس اعرفهم... معرفهمش

وبقابل ناس في الغالب عايز ماقابلهمش

بسلاح الغير مرغوب فيهم..

الوحدة بتتخلص مني

وتدوم لو حتي مبتدومش

انا مجبر رافض اجباره

علي ناس في الدنيا بتختاره

مع انه اكيد مختارهمش

ملعونة الزحمة الكدابة

والدوشة اللي بترفض بوحي

انا عمري سؤال ناقصه اجابة

ومحدش بيذاكر روحي

انا عمري ابتدا من سنة بالظبط
اول ما غضبت
اول ما رميت خوفي ورايا وعديت الخط
انا عمري ابتدا من غير ما احبي
وانا شايل ع الكتف ده صاحبي
بنشاور للناس تنضم
وبرغم الغاز لسه هدومنا
وريحتها ما بين خل ودم
شايلين اعلام بنقول بلدي
مولود مش بحلم علي أدي
وكأني غريق لقي قشاية توديه للشط
اتناشر شهر يادوب سني
ابتدو مع صاحب راح مني
بيموت وبيصرخ روح كمل
وانا هقعد في السما مستني
انا عمرى يدوب سنة ولكني
شكلي اتأخرت

كان بيسمع فيلم عربي
غالبا شمس الزناتي
خالة حنة كت جميلة
حبها عادل امام
عم طفشان الحنين
مات عشان عيل يعيش
دمعته كت أقوي منه
اصلها بتنزل يدوبك من مفيش
بس فجأة بدون مبرور
المذيعة المزة قالت
ننتقل حالا وعاجل
صورة حية من الميدان
ناس بتجري وناس بتضرب
ناس بتهرب ناس بتهتف
قال في سره حاجة تقرف
واما شاف واحد بينرف
والحكاية فيها موت
راح مقلب بالريموت

رحمتك اكبر مساحة
مهما بيضيق الوجود
دعوتك للقلب راحة
جاية من وضع السجود
الرحيم اسمك ووصفك
ياللي مابتظلم عبيد
قلبى متعشم في عطفك
رغمي اني كتيربعيد
رحمة نازلة وذنب طالع
وف رضاك القلب طامع
ده انت شايف وانت سامع
وانت اقرب م الوريد

عرقين خشب
عمدان لسقالة شقي
وأيدين فقير متعلقة.. في الكام جنيه
وهيعمل ايه
الدنيا أخدت ضحكته.. وضحكت عليه
والخوف مكتف خطوته
ويوماتي علشان لقمته
الموت بيلعب لعبته.. قدام عنيه
ومفيش هزار
العمر مش لعبة قمار
والتضحية.. أوقات مبتكونش اختيار
لكنه علشان الصغار
علق سنين عمره ف هوا
عشان رغيف علشان دوا
علشان يحوش كام أمل.. ضد الظروف
محتاج يشوف
من تحت عقب الحلم.. حبه ضي جي
ويوماتي بيموت م التعب
لكنه حي

فاتح صدره في وش الموت
كاسر عين الطلقة بعينه
بينها وبينه مفيش مسافات
ايده في وسطه وثقتة بنفسه بتأكدلك
انه هيفرح أوي لو مات
حط الخوف والدنيا في ضهره واللي اتشهرو والعدسات
لكن ساب للشاشة سؤال واستفهام من غير علامات
سابو لكل عيون شايفينه ومش عارفينه
اللي قالوله تسلم يابني ينصر دينك
من فيهم كان عارف دينه !!

يا بنتي ليه تنزلي وتعري ناس خايفين
طمعتي فيكي الرمم وعصابة الملاعين
كل اللي هب ودب هان عرضك
حتي ولاد الكلب والفراعين

يانتي ليه تنزلي وتروحي للتحرير
نخوة رجال البلد لكاميليا او لعبير
لو كنتي بتفكري تتعري بمزاجك
مليون دكر يفتكر حرية التعبير

يابنتي ليه تنزلي سيبي القرون نايمة
دول طمعانين كلهم في كراسي مش دايمة
رغم الخطب والنخب والرغي والتصريح
الكل وقت الريح بيعوم مع العايمة