‎

احتمالات التفرد فى القصيدة
تبتدى
لحظة خروجك وردة
من بين السطور
انا وانتِ والحلم الشقي

ومرح الطيور
والشوق ما بيننا
جزيرة خضرة
بعيدة عن كل البشر
تفتكرى ممكن يحصل ايه؟؟
ما تكمليش

ما تفكريش غير ف اللى جىّ
هابعت احاسيس البنفسج
تحضنك
واخفض جناح العشق
لعنيكى الربيع
واهاديكى بالرطب الجنية كلها
ونهز جذع الفرحة
بخيالنا الوسيع
والشوق سنابل وردى
يرميها القمر
برد وسلام ف قلوبنا
ونضارة النعيم
تفتكرى ممكن يحصل ايه؟؟
ما تكمليش
ما تكمليش

أخرس
مش من حق همومك تنقص
مش من حقك حتى تفضفض
وأوعى تنفض
دوسيهات الحزن اللي ف قلبك
من عفن الصمت اللى راكبها
ومركبها مراوح صدرك
طابقه علية ومطبقه حلمك
بين صوابعها
الحلم أتطبق
زي كَاِرّتة قديمة هرسها
قطر حديد متعافى بيجرى
حزنك غجرى
كل ما تصحى يخربش وشك
أرجع عشك
كمل نومك جوة القمقم
واوعى تفكر نفسك مارد
ممكن يطلع
أعقل وأرجع
كل الورد خلاص اتقطف
والمساحيق مش قادرة تنظف
بقع الذل ملطخه توبك
كل ذنوبك يا ابنى فى كفه وصمتك بس لوحدة فى كفه
سرقوا الدفة وأية اللي فاضلك
هات من دقنك كده كام شعرة
وأنا حافتلك دفة جديدة
أى نهاية حتبقى سعيدة
بلاش تستعجل
اصبر اجل
ولا اقولك أحسن
تخرس
أخرس

فى ناس قالوا انك جدع مش تمام
وناس قالوا خاين عدو النظام
وناس غاروا منك
وناس قالوا انك
حكايتك يا صاحبى
فى بيان نمرة كام

بيان العمالة
بيان الفلول

بيان ايوة عارف
لكن مش حقول

بيان مش بإيدى
مشفتش با سيدى

بيان يامه دقت
على الراس طبول

حكايتك يا صاحبى
فى بيان نمرة كام

بيان مصر حرة
وبدأ النشيد

بيان اة يا عينى
ضربها البعيد

بيان عباسية
بيان بورسعيد

بيان من بيان
من بيان من بيان

ولسه با صاحبى مجاش الاوان

ولسه اللى شايب متبت فى بكرة
وبكرة ابتسامه ودم الشهيد

مصر زى ما هى هى
العجوز بالجلابية
والدبل فى ايدين صبية
والفوارس فى الميدان
مصر متغيرش حالها
كلنا نحقق امالها
اللى غايب واللى جالها
جالها مشتاق من زمان
مصر يا ولاد زى فرحة
فوق كتافها النصر طرحة
بالهداوة والمصارحة
نوصلوا لبر الامان