قصيدة ماتكمليش للشاعر ميسرة صلاح الدين

‎

احتمالات التفرد فى القصيدة
تبتدى
لحظة خروجك وردة
من بين السطور
انا وانتِ والحلم الشقي

ومرح الطيور
والشوق ما بيننا
جزيرة خضرة
بعيدة عن كل البشر
تفتكرى ممكن يحصل ايه؟؟
ما تكمليش

ما تفكريش غير ف اللى جىّ
هابعت احاسيس البنفسج
تحضنك
واخفض جناح العشق
لعنيكى الربيع
واهاديكى بالرطب الجنية كلها
ونهز جذع الفرحة
بخيالنا الوسيع
والشوق سنابل وردى
يرميها القمر
برد وسلام ف قلوبنا
ونضارة النعيم
تفتكرى ممكن يحصل ايه؟؟
ما تكمليش
ما تكمليش