قصيدة محبة للشاعر هيثم دبور

النخل نَخ من الصبى يوم ما اتولد
الجذع ميل ع المسيح يستعطفه
يقطف من الجنة هدية مولده حبة رطب
ينفع تقوللى بعدها إنه اتصلب؟!
عادوا الأكمة مزأططين ساعة الشفا
حتى المرض مكسور على كف السلام
الدنيا جاهلة مفزعة..
والناس مريضة بغلّها..
بيطرزوا م الشوك تيجان..
ولو الشفا مش معجزة.. فالمعجزة هى السلام
ده النصر مش مشروط يكون للى غلب
ينفع تقوللى بعدها إنه اتصلب؟!
ياللى خلقت بإذن ربك بالمحبة حمام يطير
يفرد جناحه على الجبابرة المفسدين
ملعون أيادى مين حرق غصن الزيتون
حتى الأعادى جوه قلبه يحبهم
لساه مصدق إن فيه أجحار تلين
لساه بينطق جّوه مهده للجموع
أنا النبى عيسى يسوع
لا تظلموا الحمل الرضيع
الست دى داقت عشان بس أتولد
أصناف كتيرة من التعب
ينفع تقوللى بعدها إنه اتصلب؟!