قصيدة أبونا أدم للشاعر هيثم دبور

أبونا آدم يوم ما شاف الأرض بكْر/
وبص فوقه للسما/
وملّ عينه م البراح/
مالمحش سقف يقيده/
مين اللى قرر يبنى سقف؟!/
ومين وراه بيؤيده؟!/
مين اللى فكّر يلغى حلم اللانهاية/
بخط أفقى يحدده/
مكانه فوق الراس تمام/
مكانه فوق الصوت لجام/
مكانه فوقك مهما رُحت/
سقفك ده أرض لحد قرر تبقى تحت/
ساكن فوقيك/
بيدوس برجله ع البلاط/
وعلى سبيل الاحتياط/
بيدُكّ سقفك واحدة واحدة ويضغطه/
وانت أسير الانضغاط/
فيختفى الهوا اللى موجود فى المكان/
وتلاقى نفسك ينكتم/
ندمك على خوفك ساعتها يفيد بإيه..!/
فى حد مات نفعه الندم