قصيدة يا مصر لا تحزني للشاعرة دعاء عبد الوهاب

يا مصر ولا تِحزنى
أبداً و لا تخافى ..
صوت الرصاص و النار ..
ما يردنى عنِـك ..
برضو الطريق هامشيه ..
علمِك على كتافى ..
أحمر بلون دمى ..
أبيض بلون حلمِك ..
إسود على الكارهين
لحظة شروق الشمس ..
إسود على اللى يبيع
بُكره عشان الأمس ..

بيقولوا عنى عويل
و بلطجى و مأجور ..
عايزينِّى أرضى العتمه
بعد أما شفت النور
لكن ولا يهمِّك ..
سيبى اللى يتكلم
يا مصر يتكلم
مانكِرش بتألم
لكنى مش راجع ..
سيبى اللى عاش ف الخوف
يفضل ف سجن الخوف
و انا لو يبيع الكــل
يا حبيبتى مش بايع

يا مصر و لا تِحزنى
أبداً و لا تخافى
قلب الميدان نادَى
قلبى أنا سامع