قصيدة ميت قديم للشاعر هيثم دبور

ميت قديم/
شاف موته في نظام بهدِلـُه/
قيّد مصيره وسلسِلُه/
شاف مُوتُه بس اتحمله/
وعاش حياته في الوطن ميت قديم/
لا يخاف على خروج النَفَس/
أو شمس روحه أحسن تِغِيم/
محسوبك أنا ميت قديم/
قرا الجرايد طنطنة/
داق موته ميّه مسرطنة/

واستنى دوره في مصل محقون في الوريد/
ومالقاهوش/
داق مُوتُه شفقة في الوشوش/
وسط استغاثات البشر جوّه البرامج كل يوم/
"ساعدنا الله يكرمك/
ناشد وزير اللي اسمه إيه/
لمسة تعاطف أو كرم/
واحنا عهدنا حضرتك راجل كريم/
انصرنا وحياة النبي"/
يبقى اللي داق من كل ده/
هيهمه غيظك يا غبي/
فـ إوعاك تقوللي موت بغيظك يا غشيم/
ميّت قديم/
شاف مُوتُه ذل من الكفيل/
من لقمة ناشفة بالحلال تهد حيل/
من حَنْية الضهر اللي شال/
أو م العيال/
من اللي صرّح وقتها بـ "كل شئ مظبوط وعال"/
وإن النمو معرفش إيه/
أو العدالة أبصر إيه/
يبقى اللي داق من كل ده/
هيهمه غيظك يا سَفِيه/
فـ إوعاك تقوللي موت بغيظك يا غشيم/
ميّت قديم/
كنت انت فين وقت أما مات من رأي قاله واترصد/
يوم ربطوا جيده في المسد/
وخزوقوه/
وصوّروه/
وضحكوا في الخلفية فاكرين موّتوه/
لكنه عاش ميّت قديم/
ثار ع الوريث ونظام أبوه/
وانتو اكتفيتوا تعمموه/
وتزيدوا إيده بمسبحة/
وتقيموا من خلفه الصلا/
وتشوفوا ناس متقتّلة/
لا تصلوا غايب أو جنازة على النعوش/
وتخوّنوا كل اللي لسه ما بايعهوش/
وتقولوا دورهم لسه جيّ/
ما هيبقى فيهم حد حيّ/
بس احنا متنا قبل سابق في الميدان/
في استاد عريض ملهوش بيبان/
والباقي منّا رسمة ممسوحة أساسا م الحيطان/
وذكرى يوم المعمعة/
يبقى اللي داق من كل ده/
هيهمه غيظ الإمعة/
فـ إوعاك تقوللي موت بغيظك يا غشيم/
ميّت قديم/
شاف مُوتُه طلقة في الصدور/
وماكانش عارف جت منين/
مانشيت أحمر تكتبوه/
"بانديتا سفلة مخرّبين"/
صلف اللي فاتوا في كلمتين/
موتوا بغيظكم واحنا هنكمل كده/
الكرسي مش حدوته طاهرة في أفئدة/
موتوا بغيظكم واللي مش عاجبه يغور/
الكرسي دور.. واحنا انتظرنا ألف دور/
موتوا بغيظكم مننا/
بس احنا متنا يوم ما قالوا المسجونين/
"عبّارة م اللي بيغرقوا"/
"أنا مش هرد .. هسيب حسين"/
أو يوم ما قال "اتسلوا" معدومة الضمير/
يبقى اللي داق من كل ده/
هيهمه غيظك يا حقير/
فـ إوعاك تقوللي موت بغيظك يا غشيم/
ميّت قديم/
داق موته شوم بلطجة/
عرّوا بناته ع الطريق/
دهسوا شرفهم باللسان/
ونجّسوا طـُهر الميدان/
واحتفلوا بعد ما مر عام/
أمّا الكلام/
فاتبدل "الأخوة" في خطابات الرئيس/
لـ "أهلي وعشيرتي في البيوت"/
أما زباينة الرئيس../
أصحابنا لو غضوا الطرف/
لو عيّشونا في الترف/
لو مدّوا كابل الكهربا برّه الحدود/
والناس عرايا من العرق/
و"النهضة" أحلام تتسرق/
زي "القيادة والعبور"/
وتفوت سنين وتظن شعبك لن يثور/
والفقر راكنه جنب حيط/
يبقى اللي داق من كل ده/
هيهمه غيظك يا عبيط/
فـ إوعاك تقوللي موت بغيظك يا غشيم/
ميّت قديم/
عمرك لقيت ميّت يخاف الموت يجيه/
أو تصريحات اللي يعاديه/
أو ألف واحد مطلوقين فبينهشوه/
لسّاك غشيم/
لسّاك عبيط/
غبي وحقير وإمعة/
وعبد من ضمن العبيد/
ميّت قديم بس انتصرت/
ما هخافش أكون ميّت جديد

 

إهداء للشهيد بإذن ربه الصحفي "الحسيني ابو ضيف"